3 ವರ್ಷಗಳ ಬಳಿಕ ನೀರಿನಿಂದ ಹೊರಬಂದ KRS ಪುರಾತನ ದೇವಾಲಯ

ಮಂಡ್ಯ: ಹಳೇ ಮೈಸೂರು ಭಾಗದ ಜೀವನಾಡಿಯಾಗಿರುವ ಕೃಷ್ಣರಾಜಸಾಗರ ಅಣೆಕಟ್ಟೆಯ ನೀರಿನ ಮಟ್ಟ ದಿನೇದಿನೇ ಇಳಿಕೆಯಾಗುತ್ತಿದ್ದು, ಕೆಆರ್‌ಎಸ್‌ ಹಿನ್ನೀರಿನಲ್ಲಿ ಮುಳುಗಿದ್ದ ಶ್ರೀ ನಾರಾಯಣಸ್ವಾಮಿ ದೇಗುಲ (Sri Narayanaswamy Temple) ಮೂರು ವರ್ಷಗಳ ಬಳಿಕ ಮತ್ತೆ ಸಂಪೂರ್ಣವಾಗಿ ಗೋಚರಿಸಿದೆ. ಕೆಆರ್‌ಎಸ್‌ (KRS) ಹಿನ್ನೀರಿನ ಬೋರೆ ಆನಂದೂರು ಸಮೀಪ ನೀರಿನಲ್ಲಿ ಮುಳುಗಿದ್ದ ಈ ಪುರಾತನ ದೇಗುಲ ಇದೀಗ ಮತ್ತೆ ಮೇಲಕ್ಕೆ ಕಾಣಿಸಿಕೊಂಡಿದೆ. ಕೃಷ್ಣರಾಜಸಾಗರ ಅಣೆಕಟ್ಟೆ ನಿರ್ಮಾಣದ ವೇಳೆ ಸ್ಥಳಾಂತರಗೊಂಡಿದ್ದ ಈ ದೇವಾಲಯದ ಗೋಪುರ ಹಾಗೂ ಕಂಬಗಳು ಮಾತ್ರ ಈಗಲೂ ಉಳಿದಿವೆ. ಸುತ್ತಮುತ್ತಲಿನ ಹತ್ತುಕ್ಕೂ ಹೆಚ್ಚು ಗ್ರಾಮಗಳ ಮನೆದೇವರಾಗಿರುವ ಶ್ರೀ ನಾರಾಯಣಸ್ವಾಮಿಗೆ ಈಗ ಮಜ್ಜಿಗೆಪುರ ಗ್ರಾಮದಲ್ಲಿ ಹೊಸ ದೇವಸ್ಥಾನ ನಿರ್ಮಿಸಲಾಗಿದ್ದು, ಅಲ್ಲೇ ಮೂಲ ಮೂರ್ತಿಗೆ ಪ್ರತಿದಿನ ಪೂಜೆ ನಡೆಯುತ್ತಿದೆ. 2019ರ ಬಳಿಕ 2023ರಲ್ಲಿ ದೇಗುಲ ಕಾಣಿಸಿಕೊಂಡಿದ್ದು, ಇದೀಗ ಮತ್ತೊಮ್ಮೆ ಹಿನ್ನೀರಿನಲ್ಲಿ ಹೊರಹೊಮ್ಮಿದೆ. ಅಣೆಕಟ್ಟೆ ನಿರ್ಮಾಣದ ಸಂದರ್ಭದಲ್ಲಿ ಗ್ರಾಮಗಳ ಜೊತೆಗೆ ದೇವರನ್ನೂ ಮಜ್ಜಿಗೆಪುರಕ್ಕೆ ಸ್ಥಳಾಂತರಿಸಲಾಗಿತ್ತು. ಇತ್ತೀಚೆಗೆ ಮಳೆಯ ಕೊರತೆಯಿಂದ ಹಿನ್ನೀರಿನ ಪ್ರದೇಶಗಳಲ್ಲಿ ಬೆಳೆ ಬೆಳೆಯಲು ಸಾಧ್ಯವಾಗದೆ ರೈತರು ಸಂಕಷ್ಟ ಎದುರಿಸುತ್ತಿದ್ದು, ಅಣೆಕಟ್ಟೆಯ ನೀರಿನ ಮಟ್ಟ ನಿರಂತರ ಕುಸಿಯುತ್ತಿರುವುದು ನೀರಿನ ಅಭಾವದ ಆತಂಕವನ್ನು ಹೆಚ್ಚಿಸಿದೆ. ಬೋರೆ ಆನಂದೂರು ಗ್ರಾಮದ ಸಮೀಪದ ಕಗ್ಗಲಿ ಅರಣ್ಯ ವಲಯದಲ್ಲಿ ಈರಣ್ಣ ಮತ್ತು ಸೂರಣ್ಣ ದೇವರ ಎರಡು ಕಲ್ಲಿನ ವಿಗ್ರಹಗಳೂ ಕಾಣಿಸಿಕೊಂಡಿವೆ. ಶಿವಪೂಜೆಯ ದೃಶ್ಯಗಳು ಹಾಗೂ ವಿವಿಧ ಭಂಗಿಗಳ ಕೆತ್ತನೆಗಳು ಈ ಶಿಲೆಗಳಲ್ಲಿ ಗಮನಸೆಳೆಯುತ್ತಿವೆ. ಹಳೆಗನ್ನಡದ ಶಾಸನಗಳೂ ಕಂಡುಬಂದಿದ್ದರೂ, ವರ್ಷಗಳ ಕಾಲ ಹಿನ್ನೀರಿನಲ್ಲಿ ಮುಳುಗಿದ್ದರಿಂದ ಅವು ಮಸುಕಾಗಿವೆ. ಹಿನ್ನೀರಿನ ಎತ್ತರ ಪ್ರದೇಶವಾಗಿರುವ ಕಾರಣ ನೀರಿನ ಸಂಗ್ರಹ ಕಡಿಮೆಯಾಗದಂತೆ ಇಲ್ಲಿ ಹಿಂದೆ ಅಡ್ಡಬಂಡೆ ನಿರ್ಮಿಸಲಾಗಿದ್ದು, ಆ ಸಮಯದಲ್ಲೇ ಈ ಕಲ್ಲುಗಳನ್ನು ಪ್ರತಿಷ್ಠಾಪಿಸಿರಬಹುದು ಎಂದು ಗ್ರಾಮದ ಹಿರಿಯರು ಅಭಿಪ್ರಾಯಪಟ್ಟಿದ್ದಾರೆ.

Also read

ನಾಗಮಂಗಲ: ತಾಲೂಕಿನ ರಾ ಹೆ 75ರ ವರಾಹಸಂದ್ರ ಸಮೀಪ ಕೆಎಸ್‌ಆರ್‌ಟಿಸಿ ಬಸ್‌ ಹಾಗೂ ಟ್ರ್ಯಾಕ್ಟ‌ರ್ ಅಪಘಾತ : ಬಸ್ ಚಾಲಕ ದುರ್ಮರಣ