सतीश जारकीहोळींना उपमुख्यमंत्रीपदाची संधी? काँग्रेसमध्ये मोठ्या घडामोडी

बेळगाव : कर्नाटकातील काँग्रेस सरकारमध्ये संभाव्य मंत्रिमंडळ विस्तार आणि उपमुख्यमंत्रीपदाच्या चर्चांनी पुन्हा एकदा राजकीय वातावरण तापले आहे. सार्वजनिक बांधकाम मंत्री सतीश जारकीहोळी यांच्या नावाची उपमुख्यमंत्रीपदासाठी गंभीर चर्चा सुरू असल्याची माहिती राजकीय वर्तुळात पुढे येत आहे. मात्र, याबाबत अद्याप पक्षाकडून कोणतीही अधिकृत घोषणा करण्यात आलेली नाही.
राज्यातील विविध सामाजिक आणि प्रादेशिक समीकरणांचा विचार करून अतिरिक्त उपमुख्यमंत्री पदांची निर्मिती करण्याबाबत काँग्रेसमध्ये पडद्यामागे चर्चा सुरू असल्याचे बोलले जात आहे. आगामी जिल्हा परिषद आणि तालुका पंचायत निवडणुकांच्या पार्श्वभूमीवर पक्ष संघटना अधिक मजबूत करण्यासाठी हा निर्णय महत्त्वाचा ठरू शकतो, अशी राजकीय विश्लेषकांची मते आहेत.
सतीश जारकीहोळी यांनी गेल्या काही वर्षांत संघटनात्मक पातळीवर प्रभावी कामगिरी केली आहे. बुद्ध, बसवेश्वर आणि डॉ. बाबासाहेब आंबेडकर यांच्या विचारांचा प्रचार, तसेच अहिंदा (अल्पसंख्याक, हिंदू मागासवर्ग आणि दलित) मतदारांमध्ये प्रभाव निर्माण करण्यासाठी त्यांनी सातत्याने प्रयत्न केले आहेत. त्यामुळे त्यांच्या नेतृत्वाकडे काँग्रेस हायकमांड सकारात्मक दृष्टीने पाहत असल्याची चर्चा आहे.
बेळगाव जिल्ह्याला यापूर्वी भाजप सरकारच्या काळात लक्ष्मण सवदी यांच्या माध्यमातून उपमुख्यमंत्रीपद मिळाले होते. त्यानंतर जिल्ह्यातील कोणत्याही नेत्याला ही संधी मिळालेली नाही. त्यामुळे पुन्हा एकदा बेळगावला उपमुख्यमंत्रीपद मिळण्याची शक्यता राजकीय चर्चेचा विषय ठरली आहे.
राजकीय सूत्रांच्या मते, राज्यातील नेतृत्वासंदर्भातील अनिश्चितता दूर झाल्यानंतर मंत्रिमंडळ विस्तारासह उपमुख्यमंत्रीपदाबाबत अंतिम निर्णय होऊ शकतो. या पार्श्वभूमीवर सतीश जारकीहोळी यांचे नाव चर्चेत असले तरी अधिकृत निर्णयाची प्रतीक्षा कायम आहे.

Also read

*ऊस उत्पादक शेतकरी आणि साखर कारखानदारांमधील संघर्षावर तोडगा; डी. के. शिवकुमार यांच्या मध्यस्थीला यश!*