ಬೆಂಗಳೂರು: ವಿಧಾನಸಭೆ ಸದಸ್ಯರ ಸದಸ್ಯತ್ವವನ್ನು ರದ್ದುಪಡಿಸುವ ಅಧಿಕಾರ ಸ್ಪೀಕರ್ಗೆ ಇಲ್ಲ ಎಂದು ಸ್ಪೀಕರ್ ಯು.ಟಿ. ಖಾದರ್ (UT Khader) ತಿಳಿಸಿದ್ದಾರೆ.
ಯೋಗೇಶ್ ಗೌಡ ಹತ್ಯೆ ಪ್ರಕರಣದಲ್ಲಿ ಕೋರ್ಟ್ ಶಾಸಕ ವಿನಯ್ ಕುಲಕರ್ಣಿ (Vinay Kulkarni) ಅಪರಾಧಿ ಎಂದು ತೀರ್ಪು ನೀಡಿದ ಹಿನ್ನೆಲೆಯಲ್ಲಿ, ಶಾಸಕ ಸ್ಥಾನ ರದ್ದುಪಡಿಸದ ಬಗ್ಗೆ ಬಸವರಾಜ ಕೊರವರ ಸಲ್ಲಿಸಿದ್ದ ಮನವಿಗೆ ಸಂಬಂಧಿಸಿ ವಿಧಾನಸೌಧದಲ್ಲಿ ಅವರು ಪ್ರತಿಕ್ರಿಯೆ ನೀಡಿದರು. ಯಾವೊಬ್ಬ ಸದಸ್ಯನ ಸದಸ್ಯತ್ವವನ್ನು ರದ್ದು ಮಾಡುವ ಅಧಿಕಾರ ಸ್ಪೀಕರ್ಗೆ ಇರುವುದಿಲ್ಲ. ಇದು ಎಲ್ಲಾದರೂ ಇರುವ ನಿಯಮವೇ? ವಿಧಾನಸಭೆಯ ವ್ಯಾಪ್ತಿಯಲ್ಲಿ ನಡೆದ ಘಟನೆಗಳಿಗೆ ಮಾತ್ರ ಸ್ಪೀಕರ್ಗೆ ಅಧಿಕಾರವಿದೆ ಎಂದು ಅವರು ಹೇಳಿದರು. ನಿಯಮದ ಪ್ರಕಾರ ಯಾರಾದರೂ ಶಿಕ್ಷೆಗೆ ಒಳಪಟ್ಟರೆ ಅವರು ಅನರ್ಹರಾಗುತ್ತಾರೆ (Deemed to be disqualified). ಅದು ಸ್ವಯಂಚಾಲಿತವಾಗಿ ಜಾರಿಗೆ ಬರುತ್ತದೆ; ನಾವು ಕೇವಲ ಮಾಹಿತಿ ನೀಡುವ ಕೆಲಸ ಮಾತ್ರ ಮಾಡಬಹುದು ಎಂದರು.
ಇದೇ ಕುರಿತು ಕಾರ್ಯದರ್ಶಿಗೆ ಪರಿಶೀಲನೆ ಮಾಡಲು ಸೂಚಿಸಿದ್ದೇನೆ ಎಂದು ತಿಳಿಸಿದ ಅವರು, ಒಂದು ಅಥವಾ ಎರಡು ದಿನ ವಿಳಂಬವಾದರೂ ಅದಕ್ಕೆ ವಿಶೇಷ ಅರ್ಥವಿಲ್ಲ ಎಂದರು. ಇದು ತನ್ನಿಂದ ತಾನೇ ರದ್ದಾಗುವ ಪ್ರಕ್ರಿಯೆಯಾಗಿದ್ದು, ತಡೆಯಾಜ್ಞೆ (ಸ್ಟೇ) ಬಂದರೆ ಮಾತ್ರ ಮತ್ತೆ ಪುನಃ ಸ್ಥಿತಿ ಬದಲಾಗುತ್ತದೆ ಎಂದು ಹೇಳಿದರು. ನಮ್ಮ ಪಾತ್ರ ಕೇವಲ ಇಂಟಿಮೇಶನ್ ನೀಡುವುದಷ್ಟೇ ಎಂದು ಸ್ಪಷ್ಟಪಡಿಸಿದರು. ಕಾನೂನು ಪ್ರಕಾರ ಆದೇಶ ಬಂದಾಗಲೇ ಸದಸ್ಯತ್ವ ಸ್ವಯಂಚಾಲಿತವಾಗಿ ರದ್ದಾಗುತ್ತದೆ ಎಂದು ತಿಳಿಸಿದರು. ಇಲ್ಲಿ ಬಿಜೆಪಿ ಅಥವಾ ಕಾಂಗ್ರೆಸ್ ಎಂಬ ಯಾವುದೇ ತಾರತಮ್ಯ ಮಾಡಿಲ್ಲ ಎಂದು ಅವರು ಹೇಳಿದರು.
ಇದರಲ್ಲಿ ಯಾವುದೇ ಪಕ್ಷಪಾತ ಇಲ್ಲ. ಸ್ವಯಂಚಾಲಿತವಾಗಿ ರದ್ದಾದ ನಂತರ ಮತ್ತೇನು ಕ್ರಮ ತೆಗೆದುಕೊಳ್ಳುವುದು? ಅವರು ಸಭೆಗೆ ಹಾಜರಾಗಲು ಸಾಧ್ಯವೇ? ಎಂದು ಪ್ರಶ್ನಿಸಿದ ಅವರು, ಮಾಹಿತಿ ಇಲ್ಲದವರಿಗೆ ಮಾಹಿತಿ ನೀಡಲಾಗುತ್ತಿದೆ ಎಂದು ಸ್ಪಷ್ಟಪಡಿಸಿದರು.
