ವಶಪಡಿಸಿಕೊಂಡ 82 ಲಕ್ಷಕ್ಕೆ ದರ್ಶನ್ ಸ್ಪಷ್ಟನೆ ನೀಡಿದರು

ರೇಣುಕಾ ಸ್ವಾಮಿ ಹತ್ಯೆ ಪ್ರಕರಣದಲ್ಲಿ ನಟ ದರ್ಶನ್ ತೂಗುದೀಪ ಸೇರಿದಂತೆ ಹಲವು ಆರೋಪಿಗಳನ್ನು ಬಂಧಿಸಿದ ನಂತರ ನಡೆದ ಶೋಧ ಕಾರ್ಯಾಚರಣೆಯಲ್ಲಿ, ದರ್ಶನ್, ವಿಜಯಲಕ್ಷ್ಮಿ, ಪ್ರದೋಶ್, ನಿಖಿಲ್ ಮತ್ತು ಕೇಶವಮೂರ್ತಿಯವರ ಮನೆಗಳಿಂದ ಒಟ್ಟು 82 ಲಕ್ಷ ರೂಪಾಯಿ ಹಣ ಪತ್ತೆಯಾದ ಬಗ್ಗೆ ತನಿಖಾ ಮೂಲಗಳು ತಿಳಿಸಿವೆ. ಈ ಮೊತ್ತವನ್ನು ಪ್ರಕರಣವನ್ನು ಮಸುಕಾಗಿಸಲು ಬಳಸಲಾಗಿರಬಹುದು ಎಂಬ ಶಂಕೆ ತನಿಖಾ ತಂಡವು ವ್ಯಕ್ತಪಡಿಸಿತ್ತು. ಇದೀಗ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ನ್ಯಾಯಾಂಗ ಬಂಧನದಲ್ಲಿರುವ ದರ್ಶನ್, ಹಣದ ಮೂಲ ಸಂಬಂಧಿತ ಮಾಹಿತಿಯನ್ನು ಅಧಿಕಾರಿಗಳಿಗೆ ನೀಡಿದ್ದಾರೆ ಎನ್ನಲಾಗಿದೆ.

ಹಣದ ಮೂಲದ ಬಗ್ಗೆ ಸ್ಪಷ್ಟ ಮಾಹಿತಿ ಸಿಗದ ಹಿನ್ನೆಲೆ, ಮೊತ್ತವನ್ನು ಆದಾಯ ತೆರಿಗೆ ಇಲಾಖೆಗೆ ಹಸ್ತಾಂತರಿಸಲಾಗಿತ್ತು. ಈಗ ಐಟಿ ಅಧಿಕಾರಿಗಳ ಮುಂದೆ ದರ್ಶನ್ ನೀಡಿದ ವಿವರಣೆಯ ಪ್ರಕಾರ, ಹಣವು ಕೃಷಿ ಹಾಗೂ ಪಶುಸಂಗೋಪನೆಯಿಂದ ಬಂದ ಆದಾಯದ ಜೊತೆಗೆ ಅಭಿಮಾನಿಗಳಿಂದ ಬಂದ ಉಡುಗೊರೆಗಳಾಗಿವೆ ಎಂದು ಅವರು ತಿಳಿಸಿರುವುದಾಗಿ ವರದಿಗಳು ಹೇಳುತ್ತವೆ. ದಾಖಲೆಗಳು ಸಂಪೂರ್ಣವಾಗಿ ಲಭ್ಯವಿಲ್ಲದಿದ್ದರೂ, ಮುಂದಿನ ಐಟಿ ರಿಟರ್ನ್ಸ್‌ನಲ್ಲಿ ವಿವರಗಳನ್ನು ಸಲ್ಲಿಸುವುದಾಗಿ ಅವರು ಭರವಸೆ ನೀಡಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ.

ಮೂರು ವರ್ಷಗಳಲ್ಲಿ ಕೃಷಿ–ಪಶುಸಂಗೋಪನೆ ಮೂಲಕ ಸುಮಾರು 25 ಲಕ್ಷ ಆದಾಯ ಗಳಿಸಿದ್ದೇನೆ ಮತ್ತು ಹುಟ್ಟುಹಬ್ಬದ ಸಂದರ್ಭ ಅಭಿಮಾನಿಗಳು ಹಾಗೂ ಪರಿಚಿತರಿಂದ ಸುಮಾರು 15 ಲಕ್ಷ ಬಂದಿವೆ ಎಂದು ದರ್ಶನ್ ಹೇಳಿಕೆ ನೀಡಿದ್ದಾರಂತೆ. ಉಳಿದ ಹಣಕ್ಕೆ ದಾಖಲೆ ಇಲ್ಲವೆಂದು ಅವರು ಒಪ್ಪಿಕೊಂಡಿರುವ ಮಾಹಿತಿ ತನಿಖಾ ತಂಡಕ್ಕೆ ಲಭ್ಯವಾಗಿದೆ.

ಇದೇ ವೇಳೆ, ಮೋಹನ್ ರಾಜ್ ಎಂಬುವರಿಗೆ ನಗದು ಸಾಲ ನೀಡಿದ್ದಾಗಿ, 2024ರ ಫೆಬ್ರವರಿಯಲ್ಲಿ ಹಣ ಕೊಟ್ಟು ಮೇ ತಿಂಗಳಲ್ಲಿ ಮರುಪಾವತಿ ಪಡೆದಿದ್ದೇನೆ ಎಂದು ದರ್ಶನ್ ಹೇಳಿಕೆ ನೀಡಿರುವುದಾಗಿ ತಿಳಿದುಬಂದಿದೆ. ಕಳೆದ ಆರು ವರ್ಷಗಳಲ್ಲಿ ಇತರರ ಬಳಿ ಸಾಲ ಪಡೆದಿಲ್ಲ ಮತ್ತು ಯಾರಿಗೂ ಹೆಚ್ಚುವರಿ ಸಾಲ ನೀಡಿಲ್ಲವೆಂದು ಅವರು ಸ್ಪಷ್ಟಪಡಿಸಿರುವುದಾಗಿ ಮೂಲಗಳು ತಿಳಿಸಿವೆ.