ಚಂಡೀಗಢ: ಸಂಘಟಿತ ಅಪರಾಧಗಳ ವಿರುದ್ಧ ಮಹತ್ವದ ಯಶಸ್ಸು ಗಳಿಸಿರುವ ಪಂಜಾಬ್ ಪೊಲೀಸರು, ಹತ್ಯೆ ಮತ್ತು ಸುಲಿಗೆ ಪ್ರಕರಣಗಳಲ್ಲಿ ಬೇಕಾಗಿದ್ದ ಗ್ಯಾಂಗ್ ಸ್ಟರ್ ಗುರ್ವಿಂದರ್ ಅಲಿಯಾಸ್ ಅಫ್ರಿದಿಯನ್ನು ಇಥಿಯೋಪಿಯಾದಿಂದ ಗಡೀಪಾರು ಮಾಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ದೋನಿ ಬಾಲ್-ಪ್ರಭ್ ದಸ್ಸುವಾಲ್ ಗ್ಯಾಂಗ್ ನ ಪ್ರಮುಖ ಸೂತ್ರಧಾರಿಯಾದ ಗುರ್ವಿಂದರ್ ಅಲಿಯಾಸ್ ಅಫ್ರಿದಿಯನ್ನು ಇಥಿಯೋಪಿಯಾದಿಂದ ಗಡೀಪಾರು ಮಾಡಲಾಗಿದೆ.
ʼಆಪರೇಷನ್ ಶಾಹಿದ್’ ಹೆಸರಿನಲ್ಲಿ ನಡೆದ ಕಾರ್ಯಾಚರಣೆಯಲ್ಲಿ ಪಂಜಾಬ್ ಪೊಲೀಸರ ಆಂಟಿ-ಗ್ಯಾಂಗ್‌ಸ್ಟರ್ ಟಾಸ್ಕ್ ಫೋರ್ಸ್, ವಿದೇಶದಲ್ಲಿರುವ ಆರೋಪಿಗಳ ಪತ್ತೆ ಮತ್ತು ಗಡೀಪಾರು ಘಟಕ ಹಾಗೂ ಕೇಂದ್ರ ತನಿಖಾ ಸಂಸ್ಥೆಗಳು . ಸುಮಾರು 10 ತಿಂಗಳ ಕಾಲ ಏಷ್ಯಾ, ದಕ್ಷಿಣ ಅಮೆರಿಕಾ ಮತ್ತು ಆಫ್ರಿಕಾದ ಹಲವು ದೇಶಗಳಲ್ಲಿ ಈತನಿಗಾಗಿ ಹುಡುಕಾಟವನ್ನು ನಡೆಸಿತ್ತು ಎಂದು ತಿಳಿದು ಬಂದಿದೆ.
ನವೆಂಬರ್ 6ರಂದು ಇಥಿಯೋಪಿಯಾದಲ್ಲಿ ಆತನನ್ನು ಬಂಧಿಸಿ ಭಾರತಕ್ಕೆ ಗಡೀಪಾರು ಮಾಡಲಾಗಿದೆ.
ಪ್ರಾಥಮಿಕ ತನಿಖೆಗಳ ಪ್ರಕಾರ, ವಿದೇಶಗಳಿಂದ ಕಾರ್ಯಾಚರಿಸುತ್ತಿದ್ದ ಗುರ್ವಿಂದರ್ ಅಲಿಯಾಸ್ ಅಫ್ರಿದಿ, ಪಂಜಾಬ್ ಅನ್ನು ಗುರಿಯಾಗಿಸಿಕೊಂಡು ಹತ್ಯೆ, ಸುಲಿಗೆ ಸೇರಿದಂತೆ ಹಲವು ಅಪರಾಧ ಕೃತ್ಯವನ್ನು ನಡೆಸುತ್ತಿದ್ದ ಎಂದು ಹೇಳಲಾಗಿದೆ.
ಗುರ್ವಿಂದರ್ ಅಲಿಯಾಸ್ ಅಫ್ರಿದಿ ಕುರಿತು ಮಾಹಿತಿ ನೀಡುವವರಿಗೆ ಪಂಜಾಬ್ ಸರಕಾರ 5 ಲಕ್ಷ ರೂ. ಬಹುಮಾನ ಘೋಷಿಸಿತ್ತು.
