ವಾಷಿಂಗ್ಟನ್: ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಸಂಪರ್ಕ ಹೊಂದಿದ್ದ ಗುಂಪೊಂದು ಅಮೆರಿಕ ಅಧ್ಯಕ್ಷ Donald Trump ಅವರ ಪುತ್ರಿ Ivanka Trump ಹತ್ಯೆಗೆ ಸಂಚು ರೂಪಿಸಿದ್ದ ಪ್ರಕರಣ ಬೆಳಕಿಗೆ ಬಂದಿದೆ.
32 ವರ್ಷದ ಮೊಹಮ್ಮದ್ ಬಕರ್ ಸಾದ್ ದಾವೂದ್ ಅಲ್-ಸಾದಿ ಈ ಪ್ರಕರಣದ ಪ್ರಮುಖ ಶಂಕಿತನಾಗಿದ್ದಾನೆ. 2020ರಲ್ಲಿ ನಡೆದ ಯುಎಸ್ ಡ್ರೋನ್ ದಾಳಿಯಲ್ಲಿ ಇರಾನ್ನ ಸೈನಿಕ ಕಮಾಂಡರ್ Qasem Soleimani ಸಾವಿಗೀಡಾದ ಹಿನ್ನೆಲೆಯಲ್ಲಿ ಸೇಡು ತೀರಿಸಿಕೊಳ್ಳಲು ಆತ ಸಂಚು ರೂಪಿಸಿದ್ದಾನೆ ಎಂದು ಆರೋಪಿಸಲಾಗಿದೆ. ಆರೋಪಿ ಬಳಿ ಇವಾಂಕಾ ಟ್ರಂಪ್ ಅವರ ಫ್ಲೋರಿಡಾ ನಿವಾಸದ ನೀಲನಕ್ಷೆ ಪತ್ತೆಯಾಗಿದೆ. “ನಿಮ್ಮ ಅರಮನೆಗಳು ಅಥವಾ ಸೀಕ್ರೆಟ್ ಸರ್ವೀಸ್ ನಿಮ್ಮನ್ನು ರಕ್ಷಿಸಲಾರವು” ಎಂದು ಅಮೆರಿಕನ್ನರಿಗೆ ಬೆದರಿಕೆ ಹಾಕುವ ಪೋಸ್ಟ್ಗಳನ್ನು ಆತ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದ ಎನ್ನಲಾಗಿದೆ. “ಟ್ರಂಪ್ ನಮ್ಮ ಮನೆಯನ್ನು ಸುಟ್ಟಂತೆ ಅವರ ಮನೆಯನ್ನೂ ಸುಡುತ್ತೇವೆ” ಎಂಬ ರೀತಿಯ ಎಚ್ಚರಿಕೆ ಸಂದೇಶಗಳನ್ನೂ ಪ್ರಕಟಿಸಿದ್ದಾನೆ ಎಂದು ವರದಿಯಾಗಿದೆ.
ಇವಾಂಕಾ ಟ್ರಂಪ್ ಅವರನ್ನು ಹತ್ಯೆ ಮಾಡುವ ಉದ್ದೇಶದ ಬಗ್ಗೆ ಅಲ್-ಸಾದಿ ಪದೇ ಪದೇ ಮಾತನಾಡುತ್ತಿದ್ದ ಎಂದು ಇರಾಕ್ನ ಮಾಜಿ ರಾಜತಾಂತ್ರಿಕ Entifadh Qanbar ತಿಳಿಸಿದ್ದಾರೆ. ಮೇ 15ರಂದು ಟರ್ಕಿಯಲ್ಲಿ ಬಂಧಿತನಾದ ಈತನನ್ನು ಬಳಿಕ ಅಮೆರಿಕಕ್ಕೆ ಹಸ್ತಾಂತರಿಸಲಾಗಿದೆ. ಯುರೋಪ್ ಹಾಗೂ ಉತ್ತರ ಅಮೆರಿಕಾದಾದ್ಯಂತ ನಡೆದ 18 ದಾಳಿ ಹಾಗೂ ದಾಳಿ ಯತ್ನಗಳಲ್ಲಿ ಆತ ಭಾಗಿಯಾಗಿದ್ದಾನೆ ಎಂದು ಅಧಿಕಾರಿಗಳು ಆರೋಪಿಸಿದ್ದಾರೆ. ಫೈರ್ಬಾಂಬ್ ದಾಳಿ, ಗುಂಡಿನ ದಾಳಿ, ಯಹೂದಿ ಕೇಂದ್ರಗಳು ಹಾಗೂ ಅಮೆರಿಕನ್ ರಾಜತಾಂತ್ರಿಕ ಕಚೇರಿಗಳನ್ನು ಗುರಿಯಾಗಿಸಿಕೊಂಡ ದಾಳಿಗಳಲ್ಲೂ ಈತನ ಕೈವಾಡವಿದೆ ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.
