ಸಂಕೇಶ್ವರ: ಸಾಮಾಜಿಕ, ಸಾಂಸ್ಕೃತಿಕ ಹಾಗೂ ಮದುವೆ, ಶುಭ ಸಮಾರಂಭಗಳಿಗೆ ಅದರಲ್ಲೂ ಬಡಕುಟುಂಬಗಳಿಗೆ ಅನುಕೂಲವಾಗುವಂತೆ ಸಮುದಾಯ ಭವನ ನಿರ್ಮಿಸುತ್ತಿರುವ ಕಾರ್ಯ ಶ್ಲಾಘನೀಯ ಎಂದರು.
ಸಮೀಪದ ಹಂದಿಗೂಡ ಗ್ರಾಮದಲ್ಲಿ ಮೂರುಸಾವಿರ ಮಠದ ಶಾಖಾ ಮಠ ಲಿಂಗವರ್ತಿ ವತಿಯಿಂದ ನಿರ್ಮಿಸಲಾಗುತ್ತಿರುವ ಸಮುದಾಯ ಭವನಕ್ಕೆ ಸೋಮವಾರ ಭೂಮಿಪೂಜೆ ನೆರವೇರಿಸಿ ಅವರು ಮಾತನಾಡಿದರು.
ಗ್ರಾಮಸ್ಥರ ದೇಣಿಗೆ, ಮಠದ ನೆರವು ಹಾಗೂ ಶಾಸಕರ 10 ಲಕ್ಷ ರೂ. ಅನುದಾನ ಸೇರಿದಂತೆ ವಿವಿಧ ಮೂಲಗಳಿಂದ ಸಂಗ್ರಹವಾಗುತ್ತಿರುವ ಸಂಪನ್ಮೂಲದಲ್ಲಿ ಭವನ ನಿರ್ಮಾಣ ಕೈಗೆತ್ತಿಕೊಳ್ಳಲಾಗಿದೆ. ಗ್ರಾಮಸ್ಥರ ಮಂಗಲ ಕಾರ್ಯಗಳು ಹಾಗೂ ವಿವಿಧ ಸಾಮಾಜಿಕ ಚಟುವಟಿಕೆಗಳಿಗೆ ಈ ಭವನ ಉಪಯುಕ್ತವಾಗಬೇಕು. ಎಲ್ಲರ ಸಹಭಾಗಿತ್ವದಲ್ಲಿ ರೂಪುಗೊಳ್ಳುತ್ತಿರುವ ಕಟ್ಟಡವು ಗ್ರಾಮದ ಒಗ್ಗಟ್ಟು ಮತ್ತು ಸಹಕಾರದ ಪ್ರತೀಕವಾಗಲಿ ಎಂದು ಆಶಿಸಿದರು.
ಹುಕ್ಕೇರಿ ವಿದ್ಯುತ್ ಸಹಕಾರಿ ಸಂಘದ ನಿರ್ದೇಶಕ ವಿನಯ ಪಾಟೀಲ ಮಾತನಾಡಿ, ಹಲವು ವರ್ಷಗಳ ಹಿಂದೆ ಶ್ರೀಮಠದ ಜಮೀನು ಮಾರಾಟದಿಂದ ದೊರೆತ 4 ಲಕ್ಷ ರೂ. ಮೊತ್ತವು ಇಂದು 15 ಲಕ್ಷವಾಗಿ ಬೆಳೆದು ಸಮುದಾಯ ಭವನ ನಿರ್ಮಾಣಕ್ಕೆ ಬಳಕೆಯಾಗುತ್ತಿರುವುದು ವಿಶೇಷ. ಯಾವುದೇ ರಾಜಕೀಯ ಭೇದಭಾವಕ್ಕೆ ಅವಕಾಶ ನೀಡದೆ ಗ್ರಾಮಸ್ಥರು ಒಗ್ಗಟ್ಟಿನಿಂದ ಕೈಜೋಡಿಸಿದರೆ ಅಭಿವೃದ್ಧಿ ಕಾರ್ಯಗಳಿಗೆ ಮತ್ತಷ್ಟು ಬಲ ದೊರೆಯುತ್ತದೆ. ಗ್ರಾಮದ ಜನರ ನಡುವಿನ ಸಹಕಾರ ಹಾಗೂ ಹೊಂದಾಣಿಕೆ ಮುಂದುವರಿಯಬೇಕು ಎಂದರು.
ಕಾರ್ಯಕ್ರಮದ ಸಾನಿಧ್ಯ ವಹಿಸಿದ್ದ ಘಟಪ್ರಭಾ ಗುಬ್ಬಲಗುಡ್ಡ ಕೆಂಪಯ್ಯಸ್ವಾಮಿ ಮಠದ ಡಾ. ಮಲ್ಲಿಕಾರ್ಜುನ ಸ್ವಾಮೀಜಿ ಆಶೀರ್ವಚನ ನೀಡಿ, ಗ್ರಾಮದ ಪ್ರಗತಿಗೆ ಸಾಮರಸ್ಯದ ಬದುಕು ಅಡಿಪಾಯವಾಗಿದೆ. ಸಮುದಾಯ ಭವನವು ಕೇವಲ ಕಾರ್ಯಕ್ರಮಗಳ ಕೇಂದ್ರವಾಗದೆ, ಗ್ರಾಮಸ್ಥರನ್ನು ಒಗ್ಗೂಡಿಸುವ ವೇದಿಕೆಯಾಗಲಿ ಎಂದರು.
ಕಾರ್ಯಕ್ರಮದಲ್ಲಿ ಹುಕ್ಕೇರಿ ವಿರಕ್ತಮಠದ ಶಿವಬಸವ ಸ್ವಾಮೀಜಿ, ಯಮಕನಮರಡಿ ಮುಖಂಡರಾದ ಮಾರುತಿ ಅಷ್ಟಗಿ, ಪ್ರಶಾಂತ ಪಾಟೀಲ, ಮಹೇಶ ವಾಲಿ, ಶ್ರೀಶೈಲ ಹಿರೇಮಠ, ಉದಯ ಪಾಟೀಲ, ಕೆಂಪ್ಪಣ್ಣಾ ದೊಡಭಂಗಿ, ಮಲ್ಲಪ್ಪಾ ಚೌಗಲಾ, ಅಪ್ಪಾ ಚೌಗಲಾ, ಅಶೋಕ ಕಂಕಣವಾಡಿ, ನಿಂಗಪ್ಪಾ ತೋರವತ, ಸತ್ತೆಪ್ಪಾ ಕಂಕಣವಾಡಿ, ಬಾಳಪ್ಪ ಮಂಜರಗಿ, ಗುತ್ತಿಗೆದಾರ ಮಲ್ಲಪ್ಪ ಅಂಕಲೆ ಸೇರಿದಂತೆ ಗ್ರಾಮಸ್ಥರು ಇದ್ದರು.
