₹43 ಲಕ್ಷ ವಾಚ್ ಧರಿಸಿದ ಸಿದ್ದರಾಮಯ್ಯ–ಡಿ.ಕೆ.ಶಿವಕುಮಾರ್: ವಿರೋಧ ಪಕ್ಷಗಳ ಟೀಕೆಗಳು ತೀವ್ರ

ಬೆಂಗಳೂರು: ರಾಜ್ಯ ರಾಜಕೀಯದಲ್ಲಿ ಮುಖ್ಯಮಂತ್ರಿ ಬದಲಾವಣೆ ಮತ್ತು ಅಧಿಕಾರ ಹಂಚಿಕೆ ಕುರಿತ ಚರ್ಚೆಗಳು ಗರಮಾಗಿವೆ. ಈ ನಡುವೆ ಸಿಎಂ ಸಿದ್ದರಾಮಯ್ಯ ತಮ್ಮ ನಿವಾಸಕ್ಕೆ ಡಿ.ಕೆ. ಶಿವಕುಮಾರರನ್ನು ಉಪಾಹಾರಕ್ಕೆ ಆಹ್ವಾನಿಸಿದ್ದರು. ನಂತರ ಡಿಸಿಎಂ ಶಿವಕುಮಾರ್ ಕೂಡ ಸಿಎಂ ಅವರನ್ನು ತಮ್ಮ ಮನೆಯಲ್ಲಿ ಉಪಾಹಾರಕ್ಕೆ ಕರೆಯಿದರು. ಈ ಭೇಟಿಯಲ್ಲಿ ಇಬ್ಬರು ನಾಯಕರ ಕೈಯಲ್ಲಿ ಕಂಡ ದುಬಾರಿ ವಾಚ್‌ಗಳ ಬಗ್ಗೆ ಬಿಜೆಪಿ ಸಾಮಾಜಿಕ ಜಾಲತಾಣದಲ್ಲಿ ಟೀಕಿಸಿದೆ.

ಒಂದೇ ಬ್ರ್ಯಾಂಡ್‌ನ ವಾಚ್
ಬೆಳಗಿನ ಉಪಹಾರ ಸಂದರ್ಭದಲ್ಲಿ ಸಿದ್ದರಾಮಯ್ಯ ಮತ್ತು ಡಿ.ಕೆ. ಶಿವಕುಮಾರ್ ಇಬ್ಬರೂ ಕಾರ್ಟಿಯರ್ (Cartier) ಕಂಪನಿಯ ಗಂಟೆ ಧರಿಸಿದ್ದರು. ಈ ವಾಚ್‌ಗಳ ಬೆಲೆ ಸುಮಾರು ₹43 ಲಕ್ಷ ಎಂದು ಬಿಜೆಪಿ ಆರೋಪಿಸಿದೆ.

ಸಿಎಂ–ಡಿಸಿಎಂ ಒಂದೇ ಮಾದರಿಯ ವಾಚ್
ಬ್ರೇಕ್‌ಫಾಸ್ಟ್ ಸಭೆಗೆ ಮಾಧ್ಯಮದ ಮುಂದೆ ಬಂದಾಗ ಇಬ್ಬರ ಕೈಯಲ್ಲಿದ್ದ ವಾಚ್‌ಗಳು ಒಂದೇ ಮಾದರಿ ಮತ್ತು ಒಂದೇ ಕಂಪನಿಯವು ಎಂದು ಸ್ಪಷ್ಟವಾಯಿತು. ಇಬ್ಬರೂ ಒಂದೇ ರೀತಿ ವಾಚ್ ಧರಿಸಿರುವುದು 'ಐಕ್ಯತೆಯ ಸಂದೇಶವೇ?' ಎಂಬ ಚರ್ಚೆ ಆರಂಭಿಸಿದೆ. ಆದರೆ ವಿರೋಧ ಪಕ್ಷಗಳ ಪ್ರಶ್ನೆ ವಾಚ್‌ಗಳ ಬೆಲೆ — ಅಂದಾಜು ₹43 ಲಕ್ಷ.

ಬಿಜೆಪಿ ಟೀಕೆ
2016ರಲ್ಲಿ ಸಿದ್ದರಾಮಯ್ಯ ಧರಿಸಿದ್ದ ಹ್ಯೂಬ್ಲೋಟ್ ವಾಚ್ ಭಾರೀ ವಿವಾದಕ್ಕೆ ಕಾರಣವಾಗಿತ್ತು. ಜನರ ಆಕ್ರೋಶದ ಬಳಿಕ ಸಿಎಂ ಆ ವಾಚ್ ಹಿಂತಿರುಗಿಸಿದ್ದರು. ಈಗ ಮತ್ತೆ, ಬಿಜೆಪಿ ಎಕ್ಸ್‌ನಲ್ಲಿ ಪೋಸ್ಟ್ ಮಾಡುತ್ತಾ, “ಸಿದ್ದರಾಮಯ್ಯನವರೇ, ಸಮಾಜವಾದದ ನಿಮ್ಮ ವ್ಯಾಖ್ಯಾನ ಈಗ ಬಹಳ ದುಬಾರಿಯಾಗಿದೆ. ಬರ–ಮೂಲಸೌಕರ್ಯ ಸಮಸ್ಯೆಯಿಂದ ರಾಜ್ಯ ಕಂಗೆಟ್ಟಿದೆ. ಆದರೆ ನಮ್ಮ 'ಸರಳ ಸಮಾಜವಾದಿ' ಸಿಎಂ ಲಕ್ಷಾಂತರ ರೂಪಾಯಿ ಬೆಲೆಯ ಕಾರ್ಟಿಯರ್ ವಾಚ್ ಪ್ರದರ್ಶಿಸುತ್ತಿದ್ದಾರೆ” ಎಂದು ವ್ಯಂಗ್ಯಿಸಿದೆ.

ಜೆಡಿಎಸ್ ಪ್ರತಿಕ್ರಿಯೆ
ಜೆಡಿಎಸ್ ಕೂಡ ಎಕ್ಸ್‌ನಲ್ಲಿ ಪ್ರತಿಕ್ರಿಯಿಸಿ, “ಸಿದ್ದರಾಮಯ್ಯ ತಮ್ಮನ್ನು ಸಮಾಜವಾದಿ ಎಂದು ಹೇಳಿಕೊಳ್ಳುತ್ತಾರೆ, ಆದರೆ ನಡೆದುದು ಮಜಾವಾದಿಯಂತೆ. ಒಂದಾನೊಮ್ಮೆ ₹70 ಲಕ್ಷಕ್ಕಿಂತ ಹೆಚ್ಚಿನ ಹ್ಯೂಬ್ಲೋಟ್ ವಾಚ್‌ನಿಂದ ಟೀಕೆಗೆ ಗುರಿಯಾಗಿದವರು, ಇಂದು ಚಿನ್ನದ ಕಾರ್ಟಿಯರ್‌ ವಾಚ್ ಧರಿಸಿದ್ದಾರೆ. ಸಮಾಜವಾದದ ಬಗ್ಗೆ ಮಾತನಾಡಲು ಇವರಿಗೆ ಯಾವ ನೈತಿಕತೆ?” ಎಂದು ಆರೋಪಿಸಿದೆ.