बेळगाव | प्रतिनिधी
समाजातील गरजू रुग्णांना वेळेवर रक्तपुरवठा व्हावा आणि रक्तसाठ्यातील तुटवडा कमी व्हावा, या उद्देशाने श्री क्षेत्र दक्षिण काशी कपिलेश्वर देवस्थान, बेळगाव यांच्या वतीने सोमवार, २ फेब्रुवारी २०२६ रोजी भव्य रक्तदान शिबिराचे आयोजन करण्यात आले आहे.
हे रक्तदान शिबिर सकाळी १० ते दुपारी २ वाजेपर्यंत कपिलेश्वर देवस्थान परिसरात आयोजित करण्यात येणार असून शहरातील तरुण, नागरिक, भक्तगण आणि सामाजिक कार्यकर्त्यांनी मोठ्या संख्येने सहभागी व्हावे, असे आवाहन आयोजकांनी केले आहे.
तज्ज्ञांच्या मते, एका व्यक्तीच्या रक्तदानामुळे तब्बल तीन रुग्णांचे प्राण वाचू शकतात. रक्तदानामुळे शरीरात नवीन रक्तपेशी निर्माण होण्यास मदत होते, तसेच हृदयाचे आरोग्य सुधारते आणि रक्तदात्याची प्राथमिक आरोग्य तपासणीदेखील होते.
रक्तदानासाठी येणाऱ्या नागरिकांनी ओळखपत्र (आधार कार्ड किंवा अन्य) सोबत आणावे आणि हलका नाश्ता करून यावा, असे आयोजकांनी स्पष्ट केले आहे.
मानवतेचा संदेश देणाऱ्या या उपक्रमात सहभागी होऊन समाजाप्रती आपली जबाबदारी पार पाडावी, असे आवाहन श्री क्षेत्र दक्षिण काशी कपिलेश्वर देवस्थान व समस्त भक्त परिवारातर्फे करण्यात आले आहे.
