ತಾಳಿಕೋಟೆ,ಅ,೧೨ : ಜಗತ್ತಿನಲ್ಲಿ ಭೂಮಿತಾಯಿಯು ಎಲ್ಲ ಜೀವಿಗಳಿಗೆ ಆಶ್ರಯ ನೀಡುವ ತಾಯಿಯಾಗಿದ್ದಾಳೆ. ವಿದ್ಯೆಯನ್ನು ನೀಡುವ ತಾಯಿಯಾಗಿ ಸರಸ್ವತಿಯನ್ನು ಆರಾಧಿಸಲಾಗುತ್ತದೆ. ಅದೇ ರೀತಿ ಜಗನ್ಮಾತೆಯನ್ನು ಜಗದಂಬೆ, ರಾಜರಾಜೇಶ್ವರಿ, ಆದಿಶಕ್ತಿ, ದುರ್ಗಾದೇವಿ, ಭವಾನಿ, ಚಾಮುಂಡೇಶ್ವರಿ ಸೇರಿದಂತೆ ಅನೇಕ ಹೆಸರುಗಳಿಂದ ಭಕ್ತರು ಪೂಜಿಸುತ್ತಾರೆ. ತಾಯಿಯ ಸಾವಿರಾರು ನಾಮಗಳಲ್ಲಿ ಪ್ರತಿಯೊಂದು ನಾಮವೂ ಒಂದೊಂದು ಮಹತ್ವವನ್ನು ಹೊಂದಿದೆ. ಶ್ರೀದೇವಿಯ ಮಹಿಮೆ, ಶಕ್ತಿ, ಕರುಣೆ ಮತ್ತು ಭಕ್ತರ ಮೇಲಿನ ಅನುಗ್ರಹವನ್ನು ತಿಳಿಸುವ ಪವಿತ್ರ ಗ್ರಂಥವೇ ಶ್ರೀ ದೇವಿ ಪುರಾಣವಾಗಿದೆ ಎಂದು ಖ್ಯಾತ ಪುರಾಣ ಪ್ರವಚನಕಾರ ಯಾಳಗಿಯ ವೇ.ಬಸಯ್ಯ ಶಾಸ್ತ್ರೀಗಳು ನುಡಿದರು.
ರವಿವಾರರಂದು ಸ್ಥಳೀಯ ಎಸ್.ಕೆ.ನಗರದಲ್ಲಿರುವ ಬನ್ನಿ ಮಹಾಂಕಾಳಿ ದೇವಸ್ಥಾನದಲ್ಲಿ ನವರಾತ್ರಿ ಉತ್ಸವ ಅಂಗವಾಗಿ ಏರ್ಪಡಿಸಲಾದ ಶ್ರೀ ದೇವಿ ಪುರಾಣ ಪ್ರಾರಂಭೊತ್ಸವ ಕಾರ್ಯಕ್ರಮದಲ್ಲಿ ಪುರಾಣವನ್ನು ಭಕ್ತ ಸಮೂಹಕ್ಕೆ ಉಣಬಡಿಸುತ್ತಿದ್ದ ಅವರು ಪುರಾಣವೆಂದರೆ ಕೇವಲ ಕಥೆಗಳ ಸಂಗ್ರಹವಲ್ಲ. ಅದು ಮಾನವನಿಗೆ ಧರ್ಮ, ಭಕ್ತಿ, ಜ್ಞಾನ, ಸತ್ಯ, ನೀತಿ ಮತ್ತು ಸತ್ಕರ್ಮಗಳ ಮಾರ್ಗವನ್ನು ತೋರಿಸುವ ಆಧ್ಯಾತ್ಮಿಕ ಜ್ಞಾನದ ಭಂಡಾರವಾಗಿದೆ. ಪುರಾಣವನ್ನು ಶ್ರದ್ಧೆಯಿಂದ ಆಲಿಸುವುದರಿಂದ ಮನಸ್ಸಿಗೆ ಶಾಂತಿ ದೊರೆಯುತ್ತದೆ. ಅದರಲ್ಲಿರುವ ಸತ್ಕಾರ್ಯಗಳ ಸಂದೇಶಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳುವುದರಿಂದ ವ್ಯಕ್ತಿಯ ಬದುಕಿನಲ್ಲಿ ಉತ್ತಮ ಬದಲಾವಣೆಗಳನ್ನು ತರಲು ಸಾಧ್ಯವಾಗುತ್ತದೆ. ಆಂಧ್ರಪ್ರದೇಶದ ಹಳಿವಾಣ ಗ್ರಾಮದಲ್ಲಿರುವ ಸಿದ್ಧಪರ್ವತದಲ್ಲಿ ಚಿದಾನಂದ ಅವಧೂತರು ಹನ್ನೆರಡು ವರ್ಷಗಳ ಕಾಲ ಕಠಿಣ ತಪಸ್ಸು ಮಾಡಿದರು ಎಂಬ ಪ್ರತೀತಿಯಿದೆ. ಅವರ ನಿರಂತರ ತಪಸ್ಸು ಮತ್ತು ಭಕ್ತಿಗೆ ಮೆಚ್ಚಿದ ಜಗನ್ಮಾತೆ ರಾಜರಾಜೇಶ್ವರಿ ದೇವಿಯು ಅವರಿಗೆ ಸಾಕ್ಷಾತ್ಕಾರ ನೀಡಿದಳು ಎಂದು ಹೇಳಲಾಗುತ್ತದೆ. ದೇವಿಯ ದರ್ಶನದಿಂದ ಪುಳಕಿತರಾದ ಚಿದಾನಂದ ಅವಧೂತರು ಜಗನ್ಮಾತೆಯ ಮಹಿಮೆಯನ್ನು ಜಗತ್ತಿಗೆ ತಿಳಿಸುವ ಉದ್ದೇಶದಿಂದ ಆಕೆಯ ಚರಿತ್ರೆಯನ್ನು ಬರೆಯಲು ಸಂಕಲ್ಪಿಸಿದರು. ಆಗ ದೇವಿಯ ಅನುಗ್ರಹದಿಂದ ಈ ಪವಿತ್ರ ಗ್ರಂಥದ ರಚನೆಗೆ ಪ್ರೇರಣೆ ದೊರೆಯಿತು ಎಂಬುದು ಭಕ್ತರ ನಂಬಿಕೆಯಾಗಿದೆ. ಈ ಗ್ರಂಥವನ್ನು ಶ್ರೀ ದೇವಿ ಪುರಾಣವೆಂದು ಕರೆಯಲಾಗುತ್ತದೆ. ಇದನ್ನು ದೇವಿಯ ಮಹಿಮೆ, ಆಧ್ಯಾತ್ಮಿಕ ಜ್ಞಾನ ಮತ್ತು ಭಕ್ತಿಮಾರ್ಗವನ್ನು ತಿಳಿಸುವ ಪವಿತ್ರ ಕೃತಿಯಾಗಿ ಭಕ್ತರು ಗೌರವಿಸುತ್ತಾರೆ. ಈ ಗ್ರಂಥವನ್ನು ಚಿಂತಾಮಣಿ ಎಂದೂ ಕರೆಯಲಾಗುತ್ತದೆ ಎಂಬ ಪ್ರತೀತಿಯಿದೆ. ಚಿಂತಾಮಣಿ ಎಂದರೆ ಚಿಂತೆಗಳನ್ನು ನಿವಾರಿಸಿ ಮನಸ್ಸಿಗೆ ನೆಮ್ಮದಿಯನ್ನು ನೀಡುವ ಜ್ಞಾನದ ಸಂಕೇತವಾಗಿದೆ. ಶ್ರೀ ದೇವಿ ಪುರಾಣದಲ್ಲಿ ಜಗನ್ಮಾತೆಯ ಮಹಿಮೆ, ಭಕ್ತಿಯ ಶಕ್ತಿ, ಧರ್ಮದ ಮಹತ್ವ ಮತ್ತು ಸತ್ಕರ್ಮಗಳ ಅಗತ್ಯವನ್ನು ತಿಳಿಸುವ ಸಂದೇಶಗಳಿವೆ ಮನುಷ್ಯನು ಅಹಂಕಾರ, ಅಸೂಯೆ, ದ್ವೇಷ ಮತ್ತು ದುರ್ಗುಣಗಳನ್ನು ತೊರೆದು ಪ್ರೀತಿ, ಕರುಣೆ, ಸಹನೆ, ಸತ್ಯ ಮತ್ತು ಸೇವಾಭಾವವನ್ನು ಬೆಳೆಸಿಕೊಳ್ಳಬೇಕು ಎಂಬುದೇ ಇಂತಹ ಧಾರ್ಮಿಕ ಪ್ರವಚನಗಳ ಮುಖ್ಯ ಉದ್ದೇಶವಾಗಿದೆ ಎಂದರು.
ಇನ್ನೋರ್ವ ಸಸಿಗೆ ನೀರುಣಿಸುವ ಮೂಲಕ ಉದ್ಘಾಟನಾ ಕಾರ್ಯಕ್ರಮ ನೆರವೇರಿಸಿದ ಬಸನಗೌಡ ಪಾಟೀಲ(ಯಡಿಯಾಪೂರ) ಅವರು ಮಾತನಾಡಿ ದೇವಿಯ ಆರಾಧನೆಯು ಕೇವಲ ಬಾಹ್ಯ ಪೂಜೆಗೆ ಸೀಮಿತವಾಗಿರಬಾರದು. ದೇವಿಯು ಬೋಧಿಸುವ ಸತ್ಯ, ಧರ್ಮ ಮತ್ತು ಕರುಣೆಯ ಮೌಲ್ಯಗಳನ್ನು ನಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳುವುದೇ ನಿಜವಾದ ಭಕ್ತಿಯಾಗಿದೆ. ಶ್ರೀ ದೇವಿ ಪುರಾಣವನ್ನು ಒಂಬತ್ತು ದಿನಗಳ ಕಾಲ ಶ್ರದ್ಧಾಭಕ್ತಿಯಿಂದ ಆಲಿಸುವ ಸಂಪ್ರದಾಯವನ್ನು ಅನೇಕ ಭಕ್ತರು ಪವಿತ್ರ ಧಾರ್ಮಿಕ ಆಚರಣೆಯಾಗಿ ಪರಿಗಣಿಸುತ್ತಾರೆ. ಈ ಸಂದರ್ಭದಲ್ಲಿ ದೇವಿಯ ಪೂಜೆ, ಪ್ರಾರ್ಥನೆ, ದೀಪಾರಾಧನೆ ಮತ್ತು ಪುರಾಣ ಪ್ರವಚನಗಳನ್ನು ಆಯೋಜಿಸಲಾಗುತ್ತದೆ ಎಂದರು.
ಇನ್ನೋರ್ವ ಅಸ್ಕಿ ಪೌಂಡೇಶನ್ ಅಧ್ಯಕ್ಷರಾದ ಸಿ.ಬಿ.ಅಸ್ಕಿ ಅವರು ಮಾತನಾಡಿ ಮಹಿಳೆಯರು ಸೇರಿದಂತೆ ಕುಟುಂಬದ ಎಲ್ಲ ಸದಸ್ಯರು ಈ ಧಾರ್ಮಿಕ ಕಾರ್ಯಕ್ರಮದಲ್ಲಿ ಭಾಗವಹಿಸಿ ದೇವಿಯ ಮಹಿಮೆಯನ್ನು ಆಲಿಸುತ್ತಾರೆ. ಪುರಾಣವನ್ನು ಆಲಿಸುವುದರ ಜೊತೆಗೆ ಅದರಲ್ಲಿರುವ ಉತ್ತಮ ವಿಚಾರಗಳನ್ನು ಜೀವನದಲ್ಲಿ ಪಾಲಿಸುವುದರಿಂದ ಕುಟುಂಬದಲ್ಲಿ ಪರಸ್ಪರ ಪ್ರೀತಿ, ಸಹಕಾರ, ಶಾಂತಿ ಮತ್ತು ಸೌಹಾರ್ದತೆ ಬೆಳೆಯಲು ಸಹಾಯವಾಗುತ್ತದೆ. ಪುರಾಣ ಶ್ರವಣದ ಸಂದರ್ಭದಲ್ಲಿ ಭಕ್ತರು ಮನಸ್ಸನ್ನು ಶಾಂತವಾಗಿಟ್ಟುಕೊಂಡು, ಏಕಾಗ್ರತೆಯಿಂದ ದೇವಿಯ ಕಥೆಗಳನ್ನು ಆಲಿಸಬೇಕು. ಪುರಾಣದಲ್ಲಿ ತಿಳಿಸಲಾದ ಧಾರ್ಮಿಕ ಮೌಲ್ಯಗಳನ್ನು ತಮ್ಮ ನಡೆನುಡಿಗಳಲ್ಲಿ ಅಳವಡಿಸಿಕೊಳ್ಳಬೇಕು. ದೇವಿಯ ಆರಾಧನೆಯ ಮೂಲಕ ಮನಸ್ಸಿನಲ್ಲಿರುವ ದುಃಖ, ಚಿಂತೆ ಮತ್ತು ನಕಾರಾತ್ಮಕ ಭಾವನೆಗಳನ್ನು ಕಡಿಮೆ ಮಾಡಿಕೊಂಡು ಸಕಾರಾತ್ಮಕ ಚಿಂತನೆಗಳನ್ನು ಬೆಳೆಸಿಕೊಳ್ಳುವುದು ಮುಖ್ಯವಾಗಿದೆ ಎಂದರು.
ಇನ್ನೋರ್ವ ಕೊಡಗಾನೂರಶ್ರೀಗಳು ಮಾತನಾಡಿ ಜಗನ್ಮಾತೆಯು ಸಕಲ ಜೀವಿಗಳಿಗೂ ತಾಯಿಯ ಸ್ವರೂಪವಾಗಿದ್ದಾಳೆ. ತಾಯಿಯು ತನ್ನ ಮಕ್ಕಳನ್ನು ಪ್ರೀತಿಸುವಂತೆ ದೇವಿಯು ತನ್ನ ಭಕ್ತರನ್ನು ಕರುಣೆಯಿಂದ ಕಾಪಾಡುತ್ತಾಳೆ ಎಂಬುದು ಭಕ್ತರ ಅಚಲ ನಂಬಿಕೆಯಾಗಿದೆ. ದೇವಿಯ ಆರಾಧನೆಯು ಸ್ತ್ರೀಶಕ್ತಿಗೆ ಗೌರವ ನೀಡುವ, ತಾಯ್ತನದ ಮಹತ್ವವನ್ನು ಸಾರುವ ಮತ್ತು ಎಲ್ಲ ಜೀವಿಗಳಲ್ಲಿಯೂ ದೈವತ್ವವನ್ನು ಕಾಣುವ ಮನೋಭಾವವನ್ನು ಬೆಳೆಸುತ್ತದೆ. ಸಮಾಜದಲ್ಲಿ ಧರ್ಮ, ನೀತಿ, ದಯೆ ಮತ್ತು ಮಾನವೀಯ ಮೌಲ್ಯಗಳು ನೆಲೆಸಲು ಇಂತಹ ಧಾರ್ಮಿಕ ಕಾರ್ಯಕ್ರಮಗಳು ಸಹಕಾರಿಯಾಗುತ್ತವೆ. ಶ್ರೀ ದೇವಿ ಪುರಾಣವು ಭಕ್ತಿ, ಜ್ಞಾನ ಮತ್ತು ಧಾರ್ಮಿಕ ಮೌಲ್ಯಗಳ ಮಹತ್ವವನ್ನು ನೆನಪಿಸುವ ಪವಿತ್ರ ಗ್ರಂಥವಾಗಿದೆ. ಒಂಬತ್ತು ದಿನಗಳ ಕಾಲ ನಡೆಯುವ ಪುರಾಣ ಶ್ರವಣವು ಭಕ್ತರಿಗೆ ದೇವಿಯ ಮಹಿಮೆಯನ್ನು ತಿಳಿದುಕೊಳ್ಳಲು ಮತ್ತು ಆಧ್ಯಾತ್ಮಿಕ ಚಿಂತನೆಯಲ್ಲಿ ತೊಡಗಿಸಿಕೊಳ್ಳಲು ಅವಕಾಶ ನೀಡುತ್ತದೆ. ಜಗನ್ಮಾತೆ ಶ್ರೀ ರಾಜರಾಜೇಶ್ವರಿಯ ಅನುಗ್ರಹದಿಂದ ಎಲ್ಲರ ಜೀವನದಲ್ಲಿಯೂ ಸುಖ, ಶಾಂತಿ, ಆರೋಗ್ಯ, ಐಶ್ವರ್ಯ ಮತ್ತು ನೆಮ್ಮದಿ ನೆಲೆಸಲಿ. ಎಲ್ಲರ ಮನಸ್ಸಿನಲ್ಲಿ ಭಕ್ತಿ, ಪ್ರೀತಿ, ಕರುಣೆ ಮತ್ತು ಧರ್ಮನಿಷ್ಠೆ ಬೆಳೆಯಲಿ. ಲೋಕಕಲ್ಯಾಣಕ್ಕಾಗಿ ಜಗನ್ಮಾತೆಯ ಕೃಪೆ ಸದಾ ಇರಲಿ ಎಂದರು.
ಅತಿಥಿಗಳಾಗಿ ಆಗಮಿಸಿದ ಸಂಗಮಾರ್ಯ ವಿದ್ಯಾ ಸಂಸ್ಥೆಯ ಅಧ್ಯಕ್ಷ ಎಚ್.ಎಸ್.ಪಾಟೀಲ, ಮಲ್ಲನಗೌಡ ಬಿರಾದಾರ, ಶರಣೆ ಕಾಶಿಬಾಯಿ ಭಂಟನೂರ, ಬಿ.ಎನ್.ಹಿಪ್ಪರಗಿ, ನಾನಾಗೌಡ ನಡುವಿನಮನಿ, ಸಂಗೀತಗಾರರಾದ ಗುರು ಬಿರಾದಾರ, ಕುಮಾರಿ ಅಕ್ಷತಾ ಬಿರಾದಾರ ಸಂಗೀತ ಸೇವೆ ಸಲ್ಲಿಸಿದರು. ಇದೇ ಸಮಯದಲ್ಲಿ ಅತಿಥಿ ಮಹೋದಯರಿಗೆ ಸನ್ಮಾನಿಸಿ ಗೌರವಿಸಲಾಯಿತು. ಎಸ್.ಎಂ.ಬಸಣ್ಣವರ ಸ್ವಾಗತಿಸಿ ನಿರೂಪಿಸಿದರು.
