ತಾಳಿಕೋಟೆ,ಅ,೧೨: ಮುದ್ದೇಬಿಹಾಳದಲ್ಲಿ ಇದೇ ದಿ. ೧೬ ಶುಕ್ರವಾರರಂದು ಶ್ರೀ ದುರ್ಗಾಮಾತಾದೌಡ ಕಾರ್ಯಕ್ರಮವನ್ನು ಏರ್ಪಡಿಸಲು ಹಿಂದೂಬಾಂಧವರೆಲ್ಲರೂ ನಿರ್ಧರಿಸಿದ್ದೇವೆಂದು ಮುದ್ದೇಬಿಹಾಳದ ಸಾಮಾಜಿಕ ಕಾರ್ಯಕರ್ತರಾದ ಚಂದ್ರಶೇಖರ ಕಲಾಲ ಅವರು ಹೇಳಿದರು.
ಪಟ್ಟಣದಲ್ಲಿ ಏರ್ಪಡಿಸಲಾದ ದುರ್ಗಾಮಾತಾದೌಡ ಕಾರ್ಯಕ್ರಮದ ಮಂಗಲೋತ್ಸವದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು ಮುದ್ದೇಬಿಹಾಳದಲ್ಲಿ ಜರುಗಲಿರುವ ದುರ್ಗಾದೌಡ ಕಾರ್ಯಕ್ರಮದಲ್ಲಿ ಸುಮಾರು ೫೦೦ ಕ್ಕೂ ಮೇಲ್ಪಟ್ಟು ಸುಮಂಗಲೆಯರು ಪಾಲ್ಗೊಳ್ಳುವ ನಿರೀಕ್ಷೆಯಿದೆ. ೯ ಶಕ್ತಿದೇವತೆಗಳಿದ್ದು ಶ್ರೀ ಬನಶಂಕರಿದೇವಸ್ಥಾನದಿಂದ ಮದ್ಯಾಹ್ನ ೩ ಘಂಟೆಗೆ ಸಮಸ್ತ ಹಿಂದೂ ಬಾಂಧವರು ಹಾಗೂ ಸುಮಂಗಲೆಯರಿಂದ ಪಥ ಸಂಚಲನ ಪ್ರಾರಂಭಗೊಂಡು ೯ ಶಕ್ತಿದೇವತೆಗಳ ಸ್ಥಳಗಳಿಗೆ ಭೆಟ್ಟಿ ನೀಡಿ ಉಡಿತುಂಬಿ ಆರತಿ ಬೆಳೆಗುವ ಮೂಲಕ ಪ್ರಮುಖ ರಸ್ತೆಗಳಲ್ಲಿ ಸಂಚಲನವು ಹಾಯ್ದು ಸಾಯಂಕಾಲ ೬ ಘಂಟೆಗೆ ಶ್ರೀ ರಾಘವೇಂದ್ರ ಮಂಗಲಕಾರ್ಯಾಲಯದಲ್ಲಿ ದುರ್ಗಾಮಾತಾದೌಡ ಸಮಾರೋಪಗೊಂಡು ಸಭೆಯಾಗಿ ಮಾರ್ಪಡಲಿದೆ ಎಂದರು. ಈ ಸಭೆಯಲ್ಲಿ ಪ್ರಮುಖ ಮಠಾಧೀಶರು, ಗಣ್ಯಮಾನ್ಯರು, ಸಮಸ್ತ ಹಿಂದೂ ಸಮಾಜ ಬಾಂಧವರು ಪಾಲ್ಗೊಳ್ಳಲಿದ್ದಾರೆಂದರು. ನಂತರ ಮಹಾಪ್ರಸಾದದೊಂದಿಗೆ ಕಾರ್ಯಕ್ರಮ ಮಂಗಲಗೊಳ್ಳಲಿದೆ ಎಂದು ಹೇಳಿದ ಚಂದ್ರಶೇಖರ ಕಲಾಲ ಅವರು ತಾಳಿಕೋಟೆಯ ಹಿಂದೂ ಬಾಂಧವರಿಗೆ ಕೂಡಾ ಕಾರ್ಯಕ್ರಮಕ್ಕೆ ವಿನಂತಿಪೂರ್ವಕ ಆಹ್ವಾನಿಸಿದರು.
ಇದೇ ಸಮಯದಲ್ಲಿ ದುರ್ಗಾಮಾತಾದೌಡ ಕಾರ್ಯಕ್ರಮವನ್ನು ಸಂಘಟಿಸಿದ ಗುರುರಾಜ ಮಾನೆ ಹಾಗೂ ಸಮಸ್ತ ಮಿತ್ರಮಂಡಳಿ ಹಾಗೂ ಮಾನಸಿಂಗ್ ಕೊಕಟನೂರ ಅವರ ಗೆಳೆಯರ ಬಳಗದ ವತಿಯಿಂದ ಸಮಸ್ತ ಭಕ್ತಾದಿಗಳಿಗೆ ಮಹಾಪ್ರಸಾದ ವ್ಯವಸ್ಥೆ ಕಲ್ಪಿಸಲಾಯಿತಲ್ಲದೇ ಕಾರ್ಯಕ್ರಮದಲ್ಲಿ ಪಾಲ್ಗೊಂಡ ಗಣ್ಯಮಾನ್ಯರಿಗೆ ಪುಷ್ಪನೀಡುವ ಮೂಲಕ ಎಲ್ಲರಿಗೂ ಸ್ವಾಗತಿಸಿ ಬಿಳ್ಕೊಡಲಾಯಿತು.
