बेळगाव जिल्ह्याच्या क्रीडाजगतात अभिमानाची भर टाकणारी कामगिरी करत बेळगाव जिल्हा रोलर स्केटिंग असोसिएशनचा प्रतिभावान स्केटर आणि आर.एल.एस. कॉलेजचा विद्यार्थी देवेन बामणे याची जागतिक रोलर स्केटिंग स्पर्धेसाठी निवड झाली आहे. ही निवड चाचणी अलीकडेच मोहाली (चंदीगड) येथे पार पडली.
स्पीड स्लालॉम या प्रकारात देवेनने उल्लेखनीय प्रदर्शन करत राष्ट्रीय पातळीवर आपले स्थान निश्चित केले असून आता तो २९ नोव्हेंबर ते ४ डिसेंबर २०२५ या कालावधीत सिंगापूर येथे होणाऱ्या जागतिक स्केटिंग स्पर्धेत भारताचे प्रतिनिधित्व करणार आहे.
देवेनने गेल्या आठ वर्षांपासून सातत्याने प्रशिक्षण घेतले असून, या निवडीसाठी त्याने दिवसरात्र परिश्रम घेतले. त्याच्या या यशाबद्दल बेळगाव जिल्हा स्केटिंग असोसिएशनचे प्रशिक्षक सूर्यकांत हिंडलगेकर यांनी त्याचे अभिनंदन केले आणि भविष्यासाठी शुभेच्छा दिल्या.
देवेनच्या यशामागे त्याचे पालक ज्योती बामणे आणि विनोद बामणे यांचे प्रेरणादायी पाठबळ असून, त्यांनी त्याला देशासाठी खेळण्यास सतत प्रोत्साहन दिले आहे.
या यशानिमित्त के.एल.ई. सोसायटीचे चेअरमन डॉ. प्रभाकर कोरे, माजी आमदार शाम घाटगे, राज घाटगे, कर्नाटक रोलर स्केटिंग असोसिएशनचे सचिव इंदूधर सीताराम, आर.एल.एस. कॉलेजचे प्राचार्य विश्वनाथ कामगोळ, तसेच अध्यक्ष उमेश कलघटगी, प्रसाद तेंडुलकर आणि सूर्यकांत हिंडलगेकर यांनी देवेनचे मनःपूर्वक अभिनंदन केले.
