ಚಂಢೀಗಡ: ಕ್ವಾಲಿಫೈಯರ್-2 ಪಂದ್ಯದಲ್ಲಿ Rajasthan Royals ವಿರುದ್ಧ ಭರ್ಜರಿ ಜಯ ಸಾಧಿಸಿದ Gujarat Titans ಮೂರನೇ ಬಾರಿ ಐಪಿಎಲ್ ಫೈನಲ್ಗೆ ಲಗ್ಗೆಯಿಟ್ಟಿದೆ. ನಾಯಕ Shubman Gill ನೇತೃತ್ವದಲ್ಲಿ ಜಿಟಿ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿದ್ದು, ಈ ಗೆಲುವಿಗಿಂತಲೂ ಹೆಚ್ಚು ಚರ್ಚೆಯಾಗುತ್ತಿರುವುದು ಗಿಲ್ ಹಾಗೂ Sai Sudharsan ಜೋಡಿಯ ಸ್ಫೋಟಕ ಜೊತೆಯಾಟ.
ಜಿಟಿ ಪರ ಇನಿಂಗ್ಸ್ ಆರಂಭಿಸಿದ ಶುಭಮನ್ ಗಿಲ್ ಮತ್ತು ಸಾಯಿ ಸುದರ್ಶನ್ ಮೊದಲ ವಿಕೆಟ್ಗೆ 167 ರನ್ಗಳ ಅದ್ಭುತ ಜೊತೆಯಾಟ ಕಟ್ಟಿದರು. ಟಿ20 ಕ್ರಿಕೆಟ್ನಲ್ಲಿ ಈ ಜೋಡಿ ದಾಖಲಿಸಿದ 11ನೇ ಶತಕದ ಜೊತೆಯಾಟ ಇದಾಗಿದ್ದು, ಈ ಮೂಲಕ Virat Kohli ಹಾಗೂ Chris Gayle ಅವರ ದಾಖಲೆ ಹಿಂದಿಕ್ಕಲಾಗಿದೆ.
ಟಿ20 ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಶತಕದ ಜೊತೆಯಾಟಗಳ ಪಟ್ಟಿಯಲ್ಲಿ ಇದೀಗ ಗಿಲ್–ಸುದರ್ಶನ್ ಜೋಡಿ ಅಗ್ರಸ್ಥಾನಕ್ಕೇರಿದೆ. 48 ಇನ್ನಿಂಗ್ಸ್ಗಳಲ್ಲಿ 11 ಶತಕದ ಜೊತೆಯಾಟವಾಡಿರುವ ಈ ಜೋಡಿ, 63 ಇನ್ನಿಂಗ್ಸ್ಗಳಲ್ಲಿ 10 ಶತಕಗಳ ಜೊತೆಯಾಟವಾಡಿದ್ದ ಗೇಲ್–ಕೊಹ್ಲಿ ಜೋಡಿಯನ್ನು ಮೀರಿಸಿದೆ. ಈ ಪಟ್ಟಿಯಲ್ಲಿ Babar Azam–Mohammad Rizwan ಹಾಗೂ AB de Villiers–ಕೊಹ್ಲಿ ಜೋಡಿಗಳು ಕೂಡ 10 ಶತಕದ ಜೊತೆಯಾಟಗಳೊಂದಿಗೆ ಸ್ಥಾನ ಪಡೆದಿವೆ.
ಮೊದಲ ವಿಕೆಟ್ಗೆ 100 ರನ್ಗಳ ಜೊತೆಯಾಟವನ್ನು ಗಿಲ್ ಮತ್ತು ಸುದರ್ಶನ್ ಎಂಟು ಬಾರಿ ನಿರ್ಮಿಸಿದ್ದು, ಪುರುಷರ ಟಿ20 ಕ್ರಿಕೆಟ್ನಲ್ಲಿ Mohammad Rizwan ಮತ್ತು Babar Azam ದಾಖಲಿಸಿದ್ದ ಸಾಧನೆಯನ್ನು ಸಮಬಲಗೊಳಿಸಿದೆ.
ಐಪಿಎಲ್ ಪ್ಲೇಆಫ್ ಇತಿಹಾಸದಲ್ಲೂ ಗಿಲ್–ಸುದರ್ಶನ್ ಜೋಡಿ ಹೊಸ ದಾಖಲೆ ಬರೆದಿದೆ. 2011ರ ಫೈನಲ್ನಲ್ಲಿ Michael Hussey ಹಾಗೂ Murali Vijay ನಿರ್ಮಿಸಿದ್ದ 159 ರನ್ಗಳ ಜೊತೆಯಾಟವನ್ನು ಮೀರಿಸಿ, ಇದೀಗ 167 ರನ್ಗಳ ಜೊತೆಯಾಟದೊಂದಿಗೆ ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ.
ಐಪಿಎಲ್ ಪ್ಲೇಆಫ್ಗಳಲ್ಲಿ ಅತ್ಯಧಿಕ ಜೊತೆಯಾಟಗಳ ಪಟ್ಟಿಯಲ್ಲಿ ಗಿಲ್–ಸುದರ್ಶನ್ ಜೋಡಿ ಅಗ್ರಸ್ಥಾನಕ್ಕೇರಿದೆ. ಇವರ ನಂತರ ಹಸ್ಸಿ–ಮುರುಳಿ ವಿಜಯ್, ಹಸ್ಸಿ–Suresh Raina, ಗಿಲ್–ಸುದರ್ಶನ್ರ ಮತ್ತೊಂದು ಜೊತೆಯಾಟ ಹಾಗೂ Manvinder Bisla–Jacques Kallis ಜೋಡಿಗಳು ಸ್ಥಾನ ಪಡೆದಿವೆ.
215 ರನ್ಗಳ ಬೃಹತ್ ಗುರಿ ಬೆನ್ನತ್ತಿದ ಗುಜರಾತ್ ಪರ ಗಿಲ್ ಹಾಗೂ ಸುದರ್ಶನ್ ಕೇವಲ 77 ಎಸೆತಗಳಲ್ಲಿ 167 ರನ್ ಕಲೆಹಾಕಿ ತಂಡಕ್ಕೆ ಗಟ್ಟಿ ಅಡಿಪಾಯ ಹಾಕಿದರು. ಸಾಯಿ ಸುದರ್ಶನ್ 32 ಎಸೆತಗಳಲ್ಲಿ 58 ರನ್ ಬಾರಿಸಿ Brijesh Sharma ಅವರಿಗೆ ವಿಕೆಟ್ ಒಪ್ಪಿಸಿದರು. ಇನ್ನೊಂದೆಡೆ ಗಿಲ್ 53 ಎಸೆತಗಳಲ್ಲಿ 104 ರನ್ ಸಿಡಿಸಿ ಗೆಲುವಿನ ಹಾದಿ ಸುಗಮಗೊಳಿಸಿದರು. ಕೊನೆಯಲ್ಲಿ Jofra Archer ವಿಕೆಟ್ ಪಡೆದರೂ, ಈ ಜೋಡಿಯ ಅಮೋಘ ಜೊತೆಯಾಟದ ನೆರವಿನಿಂದ ಗುಜರಾತ್ 8 ಎಸೆತಗಳು ಬಾಕಿ ಇರುವಾಗಲೇ ಜಯಭೇರಿ ಬಾರಿಸಿತು.
