ಹಸಿರು ಕ್ರಾಂತಿ ವರದಿ ವಿಜಯಪುರ
ವಿಜಯದಶಮಿ ಕೇವಲ ಪ್ರಾಪಂಚಿಕ ಸಂಭ್ರಮಕ್ಕೆ ಹಬ್ಬವಲ್ಲ, ಬದಲಾಗಿ ನಮ್ಮ ಆಂತರಿಕ ಅರಿವು ಜ್ಞಾನ, ತಿಳುವಳಿಕೆ ಗಂಭೀರ ನಡೆಗೆ ಈ ಒಂದು ನವದುರ್ಗೆಯರ ಆರಾಧನೆಯಂದರೇ ವಿಜಯದಶಮಿ ಕೈಗನ್ನಡಿಯಾಗಿದೆ. ನವದುರ್ಗೇರ ಆರಾಧನೆಯಿಂದ ಜೀವನ ಪರಿಪೂರ್ಣವಾಗುವುದು ಎಂದು ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿ ಶಿಲ್ಪಾ ಭಸ್ಮಿ ಹೇಳಿದರು.
ನಗರದ ಜ್ಞಾನ ಯೋಗಾಶ್ರಮದಲ್ಲಿ ಮಹಾನವಮಿ ಮಹತ್ವ ಸಾರಲು ಬುಧವಾರ ಹಮ್ಮಿಕೊಂಡ ಕಾರ್ಯಕ್ರಮದಲ್ಲಿ ನವದುರ್ಗೆಯರು ಕುರಿತು ಉಪನ್ಯಾಸ ಕಾಯ೯ಕ್ರಮದಲ್ಲಿ ಮಾತನಾಡಿದ ಅವರು, ರಾಮಾಯಣದಲ್ಲಿ 14 ವರ್ಷ ವನವಾಸಕ್ಕೆಂದು ರಾಮ-ಸೀತೆ ಲಕ್ಷ್ಮಣರು ಕಾಡಿಗೆ ತೆರಳಿದಂತಹ ಸಂದರ್ಭವನ್ನು ಹೇಳುತ್ತ ಸೀತೆಯನ್ನು ಅಪಹರಿಸಿದಂತಹ ರಾವಣನನ್ನು ಸದೆಬಡಿಯಲು ಶ್ರೀರಾಮರು ಶರಣ್ ನವರಾತ್ರಿ ವ್ರತವನ್ನು ಆಚರಿಸಿ, ವಿಜಯ ದಶಮಿ ಎಂದು ರಾವಣನನ್ನು ಸಂಹರಿಸಿದ್ದು ಒಂದು ಪೌರಾಣಿಕ ಘಟನೆ ಮಹತ್ವದ್ದು ಎಂದರು.
ನವದುರ್ಗೆಯರಾದ ಶೈಲಪುತ್ರಿ, ಬ್ರಹ್ಮಚಾರಿಣಿ, ಚಂದ್ರಗಂಟ, ಕೂಷ್ಮಾಂಡ, ಸ್ಕಂದ ಮಾತ, ಕಾತ್ಯಾಯಿನಿ, ಕಾಲರಾತ್ರಿ, ಮಹಾಗೌರಿ, ಸಿದ್ದಿದಾತ್ರಿಯರನ್ನು ಸ್ಮರಿಸಿ 9 ದಿನಗಳ ನವದುರ್ಗೆಯರ ಪೂಜೆಯು ನಮ್ಮ ಆಂತರಿಕ ಅರಿವು ಜ್ಞಾನ ತಿಳುವಳಿಕೆಗೆ ಗಂಭೀರ ನಡೆಗೆ ಒಂದು ಕೈಗನ್ನಡಿಯಾಗಿದೆ. ವೇದೋಪನಿಷತ್ತುಗಳು ಭಗವದ್ಗೀತೆ ಪ್ರಕಾರ ಮನುಷ್ಯನ ಇಡೀ ವ್ಯಕ್ತಿತ್ವ ಮನಸ್ಸು 3 ಗುಣಗಳಿಂದ ಮಾಡಲ್ಪಟ್ಟಿದೆ. ತಮೋಗುಣ ರಜೋಗುಣ, ಸತ್ವಗುಣ ಈ 3 ಗುಣಗಳು ನಮ್ಮ ಜೀವನದ ಆಗುಹೋಗುಗಳಿಗೆ ಕಾರಣ ಹಾಗೂ ಅವುಗಳೆ ನಮ್ಮನ್ನು ನಿಯಂತ್ರಿಸುತ್ತವೆ. ನಮ್ಮ ಒಳ್ಳೆಯ ಮತ್ತು ಕೆಟ್ಟ ಗುಣಗಳ ನಡುವೆ ಪ್ರತಿ ದಿನ ನಡೆಯುವ ಹೋರಾಟವೇ ಈ ನವರಾತ್ರಿ, ಮಹಿಷಾಸುರನನ್ನು ಸದೆಬಡೆದಂತಹ ಚಾಮುಂಡೇಶ್ವರಿಯ ಮಹಿಮೆಯ ಕುರಿತಾಗಿ ವಿವರಿಸಿದರು.
ಅಖಿಲ ಭಾರತ ವೀರಶೈವ ಮಹಾಸಭಾ ಅಧ್ಯಕ್ಷ ವಿ.ಸಿ.ನಾಗಠಾಣ ಅಧ್ಯಕ್ಷತೆ ವಹಿಸಿದ್ದರು. ಬಸವಲಿಂಗ ಮಹಾಸ್ವಾಮೀಜಿ ಆಶೀರ್ವಚನ ನೀಡಿದರು.
ಆದಿಶಕ್ತಿ ರೂಪವಾದಂತಹ ಪಾರ್ವತಿಯ ತಪಸ್ಸು, ಗುರಿಯಡೆಗಿನ ಗಮ್ಯಸ್ಥಾನ ತಾಳ್ಮೆ, ಸಂಯಮವನ್ನು ಈ ಒಂಬತ್ತು ದಿನಗಳಲ್ಲಿ ನವದುರ್ಗೆಯರ ಪೂಜೆಯಿಂದ ಹೊಸ ಬೆಳಕು ಪಡೆಯಬಹುದಾಗಿದೆ. ಪುರಾಣಗಳಲ್ಲಿ ನಾವು ಕೇಳುವ ಮಹಿಶಾಸುರ ಬೇರೆ ಯಾರು ಅಲ್ಲ, ಆತ ನಮ್ಮೊಳಗಿನ ಅಹಂಕಾರದ ಪ್ರತೀಕ. ನಾವು ಅಹಂಕಾರವನ್ನು ಶಮನಗೊಳಿಸುವ ದಿನಗಳೇ ನವರಾತ್ರಿಗಳು. ಶ್ರದ್ಧೆ ಮತ್ತು ಭಕ್ತಿಯಿಂದ ನಮ್ಮ ಜೀವನ ಪರಿಪೂರ್ಣವಾಗುತ್ತದೆ.
-ಶಿಲ್ಪಾ ಭಸ್ಮಿ, ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿ.
