Artemis II ಕಾರ್ಯಾಚರಣೆಯ ಪ್ರಮುಖ ಹಂತವಾದ ‘ಪೆರಿಜಿ ರೈಸ್ ಬರ್ನ್’ ಯಶಸ್ವಿಯಾಗಿ ಪೂರ್ಣಗೊಂಡಿದ್ದು, 50 ವರ್ಷಗಳ ಬಳಿಕ ಮಾನವರನ್ನು ಮತ್ತೆ ಚಂದ್ರನತ್ತ ಕರೆದೊಯ್ಯುವ ಪ್ರಯತ್ನದಲ್ಲಿ ಇದು ಮಹತ್ವದ ಮೈಲಿಗಲ್ಲಾಗಿದೆ. ಈ ಹಂತದ ನಂತರ ಸಿಬ್ಬಂದಿ ಸ್ವಲ್ಪ ವಿಶ್ರಾಂತಿ ಪಡೆದಿದ್ದು, ಬಳಿಕ Orion spacecraft ನ ಎಲ್ಲಾ ವ್ಯವಸ್ಥೆಗಳ ಮೇಲ್ವಿಚಾರಣೆ ನಡೆಸಿದರು. ಇದೇ ವೇಳೆ ಭೂ ನಿಯಂತ್ರಣ ಕೇಂದ್ರದಿಂದ EDT 7:06ಕ್ಕೆ ಹಾಡು ಪ್ಲೇ ಮಾಡಲಾಯಿತು.
ಭೂಮಿಯ ಸುತ್ತಲೂ ಪರಿಕ್ರಮಿಸುತ್ತಿದ್ದ ಬಾಹ್ಯಾಕಾಶ ನೌಕೆಯ ಕಕ್ಷೆಯ ಅತ್ಯಂತ ಕಡಿಮೆ ಬಿಂದುವಾದ ಪೆರಿಜಿಯನ್ನು ಹೆಚ್ಚಿಸಲು ಈ ಕಾರ್ಯಾಚರಣೆ ಕೈಗೊಳ್ಳಲಾಯಿತು. ಸುಮಾರು 43 ಸೆಕೆಂಡುಗಳ ಕಾಲ ಮುಖ್ಯ ಎಂಜಿನ್ ಅನ್ನು ಜ್ವಲಿಸುವ ಮೂಲಕ ನೌಕೆಯ ವೇಗ ಮತ್ತು ದಿಕ್ಕಿನಲ್ಲಿ ನಿಖರ ಬದಲಾವಣೆ ತರಲಾಯಿತು. ಈ ಪ್ರಕ್ರಿಯೆಯಿಂದ ‘ಇಂಟೆಗ್ರಿಟಿ’ ಎಂದು ಕರೆಯಲ್ಪಡುವ ಓರಿಯನ್ ನೌಕೆ ಸ್ಥಿರ ಹಾಗೂ ಹೆಚ್ಚಿನ ಎತ್ತರದ ಕಕ್ಷೆಗೆ ಸೇರಿದ್ದು, ಮುಂದಿನ ಹಂತವಾಗಿ ಚಂದ್ರನತ್ತ ತನ್ನ ಪಯಣ ಮುಂದುವರಿಸುತ್ತದೆ. ನಂತರ ಸಿಬ್ಬಂದಿ ನಾಲ್ಕೂವರೆ ಗಂಟೆಗಳ ವಿಶ್ರಾಂತಿ ಪಡೆದು ಬಾಹ್ಯಾಕಾಶದಲ್ಲಿನ ತಮ್ಮ ಮೊದಲ ಪೂರ್ಣ ದಿನವನ್ನು ಆರಂಭಿಸಲಿದ್ದಾರೆ.
ಮಿಷನ್ ನಿರ್ವಹಣಾ ತಂಡವು ಓರಿಯನ್ನ ಎಲ್ಲಾ ವ್ಯವಸ್ಥೆಗಳ ಸಮಗ್ರ ಪರಿಶೀಲನೆಗಾಗಿ ಮೊದಲ ಮಹತ್ವದ ಸಭೆಯನ್ನು ನಡೆಸಿದೆ. 1972ರ ನಂತರ ಮೊದಲ ಬಾರಿಗೆ ಗಗನಯಾತ್ರಿಗಳನ್ನು ಭೂಮಿಯ ಕಕ್ಷೆಯಿಂದ ಚಂದ್ರನತ್ತ ಕಳುಹಿಸುವ ‘ಟ್ರಾನ್ಸ್ಲೂನಾರ್ ಇಂಜೆಕ್ಷನ್ ಬರ್ನ್’ಗೆ ಅಂತಿಮ ಅನುಮೋದನೆ ನೀಡುವ ನಿರೀಕ್ಷೆಯಿದೆ.
ಈ ಟ್ರಾನ್ಸ್ಲೂನಾರ್ ಇಂಜೆಕ್ಷನ್ ಪ್ರಕ್ರಿಯೆ ಇಂದು ಸಂಜೆ 7:49 EDTಕ್ಕೆ ನಿಗದಿಯಾಗಿದ್ದು, ಸುಮಾರು 5 ನಿಮಿಷ 49 ಸೆಕೆಂಡುಗಳ ಕಾಲ ನಡೆಯಲಿದೆ. ಈ ವೇಳೆ ಸೆಕೆಂಡ್ಗೆ 1274 ಅಡಿ ವೇಗದ ಹೆಚ್ಚಳ ಉಂಟಾಗಲಿದ್ದು, ನೌಕೆಯನ್ನು ಭೂಮಿಯ ಕಡಿಮೆ ಕಕ್ಷೆಯಿಂದ ಹೊರಗೆ ಚಂದ್ರನ ದಿಕ್ಕಿಗೆ ತಳ್ಳಲಿದೆ. ಈ ಮಹತ್ವದ ಹಂತದಲ್ಲಿ, ಓರಿಯನ್ ನಿಖರ ಮಾರ್ಗದಲ್ಲಿ ಸಾಗುತ್ತಿದೆ ಎಂಬುದನ್ನು ಖಚಿತಪಡಿಸಲು ವಿಮಾನ ನಿಯಂತ್ರಕರು ಎಂಜಿನ್ ಕಾರ್ಯಕ್ಷಮತೆ, ಮಾರ್ಗದರ್ಶನ ಹಾಗೂ ನ್ಯಾವಿಗೇಶನ್ ಮಾಹಿತಿಯನ್ನು ನಿಕಟವಾಗಿ ಗಮನಿಸುತ್ತಿದ್ದಾರೆ.
