ಧರ್ಮಶಾಲಾ: Gujarat Titans ವಿರುದ್ಧದ ಪಂದ್ಯದಲ್ಲಿ ಭರ್ಜರಿ ಜಯ ದಾಖಲಿಸಿದ Royal Challengers Bengaluru ತಂಡದ ನಾಯಕ Rajat Patidar ಪಂದ್ಯಾನಂತರ ತಮ್ಮ ತಂತ್ರಗಾರಿಕೆಯ ಹಿಂದಿನ ಲೆಕ್ಕಾಚಾರವನ್ನು ಬಹಿರಂಗಪಡಿಸಿದರು. ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದ ಬಳಿಕ ಮಾತನಾಡಿದ ಅವರು, ತಂಡ ಫೈನಲ್ಗೆ ಸಿದ್ಧವಾಗುವ ನಿಟ್ಟಿನಲ್ಲಿ ಕೆಲವು ವಿಶೇಷ ಪ್ರಯೋಗಗಳನ್ನು ಮಾಡಿದೆ ಎಂದರು.
ಪಂದ್ಯದಲ್ಲಿ ವೇಗಿ Jacob Duffy ಬದಲು ಇಂಪ್ಯಾಕ್ಟ್ ಪ್ಲೇಯರ್ ಆಗಿ Romario Shepherd ಅವರನ್ನು ಕಣಕ್ಕಿಳಿಸಿದ ನಿರ್ಧಾರ ಕುರಿತು ಮಾಜಿ ಕ್ರಿಕೆಟಿಗ Murali Kartik ಪ್ರಶ್ನಿಸಿದಾಗ, ಫೈನಲ್ ಪಂದ್ಯವನ್ನು ಗಮನದಲ್ಲಿಟ್ಟುಕೊಂಡೇ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ರಜತ್ ಪಾಟಿದರ್ ವಿವರಿಸಿದರು.
“ಮುಂದಿನ ಫೈನಲ್ ಪಂದ್ಯದಲ್ಲಿ ಬೌಲಿಂಗ್ ಮಾಡುವ ಸಂದರ್ಭ ಬಂದರೆ, ಮಧ್ಯಮ ಓವರ್ಗಳಲ್ಲಿ ರೊಮಾರಿಯೊ ಶೆಪಾರ್ಡ್ ಹೇಗೆ ಪ್ರದರ್ಶನ ನೀಡುತ್ತಾರೆ ಹಾಗೂ ಒತ್ತಡದ ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸುತ್ತಾರೆ ಎಂಬುದನ್ನು ಪರಿಶೀಲಿಸಲು ಅವರಿಗೆ ಅವಕಾಶ ನೀಡಿದ್ದೇವೆ,” ಎಂದು ಪಾಟಿದರ್ ಹೇಳಿದರು.
ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಕಣಕ್ಕಿಳಿದ ಶೆಪಾರ್ಡ್ ಕೇವಲ ಒಂದು ಓವರ್ ಮಾತ್ರ ಬೌಲಿಂಗ್ ಮಾಡಿದರು. ಆ ಓವರ್ನಲ್ಲಿ 15 ರನ್ಗಳನ್ನು ನೀಡಿದರೂ, ನಿರ್ಣಾಯಕ ಪಂದ್ಯಕ್ಕೂ ಮುನ್ನ ತಂಡದ ಬೌಲಿಂಗ್ ಆಯ್ಕೆಗಳನ್ನು ಪರೀಕ್ಷಿಸಲು ಈ ಪಂದ್ಯ ನೆರವಾಯಿತು. ಈ ಭರ್ಜರಿ ಗೆಲುವಿನೊಂದಿಗೆ ಆರ್ಸಿಬಿ ತಂಡದ ಆತ್ಮವಿಶ್ವಾಸ ಮತ್ತಷ್ಟು ಹೆಚ್ಚಾಗಿದೆ.
ಗುಜರಾತ್ ಇನ್ನಿಂಗ್ಸ್ನ 11ನೇ ಓವರ್ ಬಳಿಕ ಜೇಕಬ್ ಡಫಿ ಬದಲು ಶೆಪಾರ್ಡ್ ಮೈದಾನಕ್ಕಿಳಿದರು. ಅದಕ್ಕೂ ಮುನ್ನ ಡಫಿ ತಮ್ಮ 4 ಓವರ್ಗಳ ಕೋಟಾ ಪೂರ್ಣಗೊಳಿಸಿ 39 ರನ್ ನೀಡಿ 3 ವಿಕೆಟ್ ಕಬಳಿಸಿದ್ದರು.
ಐಪಿಎಲ್ನ ಇಂಪ್ಯಾಕ್ಟ್ ಪ್ಲೇಯರ್ ನಿಯಮದ ಪ್ರಕಾರ, ಪಂದ್ಯ ಮಧ್ಯದಲ್ಲಿ ಒಬ್ಬ ಆಟಗಾರನ ಬದಲಿಗೆ ಮತ್ತೊಬ್ಬ ಆಟಗಾರನನ್ನು ಬ್ಯಾಟಿಂಗ್ ಅಥವಾ ಬೌಲಿಂಗ್ಗಾಗಿ ಬಳಸಬಹುದು. ಟಾಸ್ ಬಳಿಕ ನಾಯಕರು ಪ್ಲೇಯಿಂಗ್ XI ಜೊತೆ 5 ಬದಲಿ ಆಟಗಾರರ ಪಟ್ಟಿಯನ್ನು ನೀಡಬೇಕು.
ಈ ಐವರು ಆಟಗಾರರಲ್ಲಿ ಒಬ್ಬರನ್ನು ಮಾತ್ರ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಬಳಸಲು ಅವಕಾಶವಿರುತ್ತದೆ. ಮೈದಾನದಿಂದ ಹೊರಹೋಗುವ ಆಟಗಾರ ಮತ್ತೆ ಆ ಪಂದ್ಯದಲ್ಲಿ ಭಾಗವಹಿಸಲು ಅವಕಾಶವಿಲ್ಲ.
ಒಬ್ಬ ಬೌಲರ್ ತನ್ನ ಓವರ್ಗಳನ್ನು ಪೂರ್ಣಗೊಳಿಸಿದ್ದರೂ, ಹೊಸದಾಗಿ ಬರುವ ಇಂಪ್ಯಾಕ್ಟ್ ಪ್ಲೇಯರ್ಗೆ ಸಂಪೂರ್ಣ 4 ಓವರ್ ಬೌಲಿಂಗ್ ಮಾಡುವ ಅವಕಾಶ ಸಿಗುತ್ತದೆ.
ಪ್ಲೇಯಿಂಗ್ XI ನಲ್ಲಿ ಈಗಾಗಲೇ 4 ವಿದೇಶಿ ಆಟಗಾರರಿದ್ದರೆ, ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಭಾರತೀಯ ಆಟಗಾರನನ್ನೇ ಬಳಸಬೇಕು. ಆದರೆ 3 ಅಥವಾ ಅದಕ್ಕಿಂತ ಕಡಿಮೆ ವಿದೇಶಿ ಆಟಗಾರರಿದ್ದರೆ ಮಾತ್ರ ವಿದೇಶಿ ಆಟಗಾರನನ್ನು ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಕಣಕ್ಕಿಳಿಸಲು ಅವಕಾಶ ಇರುತ್ತದೆ. Josh Hazlewood, Tim David ಮತ್ತು ಜೇಕಬ್ ಡಫಿ ಈಗಾಗಲೇ ಪ್ಲೇಯಿಂಗ್ XI ನಲ್ಲಿ ಇದ್ದ ಕಾರಣ, ಆರ್ಸಿಬಿ ರೊಮಾರಿಯೊ ಶೆಪಾರ್ಡ್ ಅವರನ್ನು ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಬಳಸಿತು.
